Lalitpur Metro-9, Chyashal Balkumari, Lalitpur, Nepal
12 Months, 7 Days & 24 Hours Available for all.
+977 985 109 8889
डा. लक्ष्मणप्रसाद ज्ञवाली, नेपालको प्रथम नेत्रहीन अधिवक्ता The first Blind Advocate of Nepal Dr Laxman Prasad Gnawali.

अपाङ्गता परिचय पत्र जथाभावी नबाडौं

नेपालमा अपाङ्गताको पहिचान सहितको परिचय पत्र वितरण गर्न थालेको धेरै समय भएको छैन । अपाङ्ग संरक्षण तथा कल्याण ऐन २०३९ ले अपाङ्गहरूको परिभाषा गरेको हो । परिभाषा भइसकेपछि अपाङ्गता भएका व्यक्तिहरूलाई तोकिएको ढाँचामा परिचयपत्र वितरण गर्ने व्यवस्था अपाङ्ग संरक्षण तथा कल्याण नियमावली २०५१ ले गरेको हो । ऐन आएको १२ वर्ष पछि विभिन्न संघ संस्थाहरूको दवावमा तत्कालीन सरकारले नियमावली बनाएको थियो । सो नियमावलीमा उल्लिखित प्रावधानहरू मध्ये परिचय पत्र वितरण कार्यक्रम २०५७ सालको सामाजिक सेवा दिवसको उपलक्ष्य पारी मुलुकका जम्मा ७ जिल्लाबाट परिक्षणको रुपमा परिचय पत्र वितरण कार्य शुरू भएको हो । पछि क्रमशः सबै जिल्लाहरूमा लागू गरी सरकारले सबै अपाङ्गता भएका व्यक्तिहरूको पहिचान दिन शुरू गरेको हो । शुरूका दिनमा परिचय पत्र नागरिकता जस्तै मोडेलमा जिल्ला प्रशासन कार्यालयबाट जारी गरिने व्यवस्था थियो । समाजकल्याण अधिकृत तोक्न सक्ने कानूनी व्यवस्था अनुसार द्वितीय श्रेणीको प्रमुख जिल्ला अधिकारी रहने जिल्लामा प्रमुख जिल्ला अधिकारी र प्रथम श्रेणीको प्रमुख जिल्ला अधिकारी रहने जिल्लाहरूमा सहायक प्रमुख जिल्ला अधिकारीलाई समाज कल्याण अधिकृत तोकी सोही बमोजिम जिल्ला प्रशासन कार्यालयहरूबाट अपाङ्ग परिचय पत्र वितरण गरिने शुरुवात गरिएको थियो । केही वर्ष यो प्रावधान रह्यो । २०५६ सालको परिभाषा अनुसारको परिचय पत्र यसै गरी वितरण गरिएको थियो । २०६३ साल भदौमा अपाङ्गताको पुनःर्वर्गीकरण गर्दै तत्कालीन सरकारले अपाङ्गता भएका व्यक्तिहरूलाई ७ प्रकारमा विभाजन गरेको थियो भने गम्भीरताका आधारमा हरेक अपाङ्गता भित्र ४ प्रकार छुट्ट्याइएको थियो । फलस्वरुप पूर्णअशक्त अपाङ्ग, अति अशक्त अपाङ्ग, मध्यम अशक्त अपाङ्ग र सामान्य गरी ४ प्रकार कायम मात्र गरिएन प्रत्येक वर्गलाई भिन्ना भिन्नै रङमा अपाङ्ग परिचय पत्रको व्यवस्था गरियो । यसरी क्रमशः पूर्णअशक्त अपाङ्गता भएका व्यक्तिलाई रातो, अतिअशक्त अपाङ्गलाई निलो, मध्यम अशक्त अपाङ्गलाई पहेलो र सामान्य अपाङ्गलाई सेतो रङ्गको परिचय पत्र वितरण गर्न थालियो । त्यसपछि मन्त्रालयको तालुक अड्डाबाटै परिचय पत्र वितरण हुनु पर्छ भनी यो कार्य तत्कालीन महिला विकास कार्यालयलाई जिम्मा लगाइयो । यस पछिका दिनहरूमा अपाङ्ग परिचय पत्रको चरम दुरुपयोग भएको पाइन्छ । जिल्ला प्रशासनमा विवरण पेश गर्न हिम्मत नगर्ने नक्कली अपाङ्गहरूले पनि महिला विकास कार्यालयमा आफ्नो झुट्ठा विवरण पेश गरी परिचय पत्र लिन थाले । नियम कानूनभन्दा पनि बोलवालाहरूको बढि चल्न थाल्यो । राजनैतिक सोर्सफोर्सबाट सामान्य अपाङ्गता भएका व्यक्तिले पनि गम्भीर प्रकृतिका परिचय पत्रहरू लिन थाले । किनकि रातो परिचय पत्र पाउने पूर्ण अशक्त अपाङ्गले मासिक रू.१००० भत्त्ता पाउने नियम सरकारले बनायो । उता २०६३ पछि समावेशी प्रकृया शुरू भए पश्चात् अपाङ्गहरूलाई राज्यले सरकारी नोकरीमा ५% आरक्षणको व्यवस्था गर्यो । जब नोकरीमा आरक्षणको व्यवस्था भयो त्यस पछि अपाङ्ग परिचय पत्रको दुरूपयोग झन तिब्र रुपमा बृद्धि भयो । “दाहिने आँखा लगभग दृष्टिविहीन” भन्ने जस्ता समस्या राखी अपाङ्ग परिचय पत्र लिन थालियो । उता लोक सेवा आयोगमा जुन वर्गको परिचय पत्र भए पनि हुने हुनाले नक्कली अपाङ्गहरूको बृद्धि झनै बढ्यो । जसले गर्दा वास्तबिक अपाङ्गहरूलाई किनारा लगाउँदै नक्कली अपाङ्गहरूले भटाभट जागिर खान थाले । अपाङ्गता भएका व्यक्तिहरूलाई राज्यले छुट्याएका कोटाहरू धेरैजसो नक्कली अपाङ्गहरूले भरिभराउ भए । आफूलाई कहिल्यै अपाङ्ग भन्न नचाहने र समाजले पनि अपाङ्ग हो भनी नचिनेका धेरै मानिसहरू अपाङ्ग कोटामा सरकारी जागिरमा आज पनि छन् । यसको मुख्य कारण परिचय पत्र वितरण प्रकृया फितलो र गलत व्यक्तिलाई परिचय पत्र प्रदान गर्ने अधिकारीलाई कार्वाहीको व्यवस्था समेत नहुनु हो । सामान्य कार्वाहीको व्यवस्था भए पनि कार्यान्वयन नगरिएको कारणले यति धेरै दुरुपयोग भएको हो । हाल आएर २०७४ साल चैत्र २८ गतेदेखि सबै जिल्लाका महिला तथा बालबालिका कार्यालयहरू खारेज भएका छन् । त्यसपछि अपाङ्गहरूले परिचय पत्र प्राप्त गर्न विविध कारणबाट समयसमयमा अन्योल सिर्जना हुँदै आएको छ । नेपाल सरकार यसमा संवेदनशील देखिँदैन । कुनै पनि नागरिकले नागरिकता पाउन तथा राहधानी बनाउन अन्योल भएको छैन तर अपाङ्गता भएका व्यक्तिहरूको पहिचान दिने परिचय पत्र धरमरमा पारिएको छ । अपाङ्गता भएका व्यक्तिहरूको अधिकार ऐन २०७४ ले भने गलत तरिकाले असम्बन्धित व्यक्तिलाई गैरकानूनी परिचय पत्र दिने सरकारी अधिकारीलाई समेत कार्वाहीको व्यवस्था गरिएको छ । तर परिचय पत्र वितरण निकाय भने तोकिए बमोजिम हुनेछ भन्ने कानूनी व्यवस्था भएबाट सो ऐनको नियमावली बनाइ तोक्नु पर्ने देखिन्छ । हाल नियमावली नबनिसकेका अबस्थामा २०५१ सालकै नियमावली र सरकारले निर्णय गरी तोकिए बमोजिम गर्न प्रमुख जिल्ला अधिकारीलाई ने यसको जिम्मा दिइनु पर्छ । परिचय पत्र वितरण कार्यलाई सर्व सुलभ गराउन र सुरक्षित समेत गर्न जरुरी छ । नेपाली नागरिकताको प्रमाण पत्र जुन निकायबाट जारी गरिन्छ सोहि निकायबाटै अपाङ्ग परिचय पत्र पनि जारी गरिने व्यावस्था मिलाईनु पर्छ । अन्यथा अपाङ्गता भएका व्यक्तिहरू प्राकृतिक रूपमा त ठगिएकै थिए राज्यबाट पनि ठगिने छन् । परिचय पत्र वितरणको सन्दर्भमा मात्र नभै नेपाल सरकारले प्रत्येब जिल्लामा संरक्षण अधिकृत तोक्न सक्ने प्रावधान अपाङ्गता भएका व्यक्तिहरूको अधिकार सम्बन्धी ऐन २०७४ को दफा ५७ मा गरिएको छ । अपाङ्गता भएका व्यक्तिको अधिकारको संरक्षण गर्ने काम समेतका लागि नेपाल सरकारले प्रत्येक जिल्लामा अपाङ्गता संरक्षण अधिकृत नियुक्त गर्न वा सो प्रयोजनका लागि कुनै अधिकृतलाई तोक्न सक्नेछ भन्ने कानूनी व्यवस्था गरेको छ । उक्त व्यवस्थाका आधारमा सरकारले प्रत्येक जिल्लाका प्रमुख जिल्ला अधिकारीहरूलाई यो परिचय पत्र वितरणको जिम्मा लगाउनु पर्छ । राज्यले यस्ता कुराहरूलाई हल्कारुपमा लिने र यसको दीर्घकालीन असरबारे नसोची व्यवहार गर्ने गरेको पाइन्छ । हालसम्म महिला विकास कार्यालयबाट गरिँदै आएको परिचय पत्र वितरण कार्य यसको उदाहरण हो । अन्य विभिन्न ऐन कानूनहरूमा जे जस्ता कानूनी प्रावधानहरू गरिएका भए पनि दुरुपयोग रोक्ने र वास्तविक अपाङ्गता भएका व्यक्तिहरूलाई मात्र सरकारले अपाङ्गता सम्बन्धी फाइदाहरू दिन खोजेको हो भने सर्वप्रथम पहिचानबाटै वास्तविकतामा आधारित कार्य गर्नु पर्छ । जसरी गैर नेपाली नागरिकलाई नागरिकता प्रदान गर्ने निकाय र अधिकारी कार्वाहीका भागिदार छन त्यसै गरी अपाङ्गताको झुट्टा परिचय पत्र प्रदान गर्ने वा माग गर्ने दुवै पक्ष सजायका भागिदार बनाउन सक्नु पर्छ । राजनैतिक व्यक्तिहरू तथा जननिर्वाचित प्रतिनिधिहरूले पनि सस्तो सहानुभूतिका आधारमा होइन वास्तविक आवश्यकताका आधारमा मात्र सेवा सुविधाको सिफारिस गर्ने संस्कार बसाल्न सक्नु पर्छ । नत्र भने यस किसिमका दुरुपयोग रोक्न सम्भव छैन । कानुनले तय गरेको विधि विधान बमोजिम मात्र कार्य गर्ने गरेमा मात्र यस्ता प्रवृत्तीको अन्त्य गर्न सकिन्छ । पहुँचवालाहरूको गल्ति कमजोरीमा ठूलाबडाहरू चुपचाप मुकदर्शक बनेर बस्ने र निमुखाहरूलाई मात्र कानून लगाएर कस्ने प्रवृत्ती विकास गरियो भने भ्रष्टाचार रोक्न सम्भावना छैन । त्यसैले ऐनको दफा ४ मा उल्लेख भए बमोजिमको अधिकार पाउन सर्वसाधारण अपाङ्गता भएका व्यक्तिहरूले पनि सकुन भन्ने ऐनको मनसाय हो । अपाङ्गताका सवालमा राज्यले पहिचान दिने बेला निकै कसिकसाउ गर्नु पर्छ र पहिचान पाइसकेकाहरूलाई सेवा सुविधा प्रदान गर्ने बेला भने सरकार लचिलो हुनु जरूरी छ । कुनै व्यक्ति अपाङ्ग हो भन्ने कायम भइसके पछि उसले पाउनु पर्ने सेवा सुविधा तथा उसले प्रयोग गर्न पाउने अधिकारका बारेमा सरकारले खुलेर अवसर प्रदान गर्नु पर्छ । परिचय पत्र सहजै प्राप्त गर्ने तर सेवा सुविधा प्राप्त गर्न नसकिने अवस्था हाम्रो देशमा छ । यो प्रवृत्तीको तुरुन्तै अन्त्य हुनु पर्छ । जे होस राज्यले हरेक प्रकारका सेवा सुविधा तथा अधिकार र पहिचानहरूको निर्धारण गर्दा भनसुन वा मोलाहिजाको आधारमा नभइ वास्तविकता र आवश्यकताको आधारमा गर्नु पर्छ । यसबाट वास्तविक अपाङ्गता भएका व्यक्तिहरू लाभान्वित हुन्छन् । राज्य लोक कल्याणकारी हुन जान्छ । राज्यमा सुशासन कायम भै जनताहरू राज्यसत्ताप्रति विश्वस्त हुन्छन् । नागरिक समाज पनि जवाफदेही बन्छ । यसरी सबै क्षेत्रमा सकारात्मक परिवर्तन हुदै जाँदा मुलुकमा सुशासन अमन चयन कायम हुनुका साथै आम नागरिक राज्य प्रति उत्तरदायी हुने र अपाङ्गताभएका व्यक्तिहरू पनि उत्पादनशील नागरिक हुन जाने अवस्था हुन्छ । सारांशमा वास्तविक अपाङ्गता भएका व्यक्तिहरूलाई राज्यले प्रदान गर्न खोजेको अधिकार सेवा सुविधाहरू साच्चै व्यवस्थित गराउन खोजेको हो भने सर्व प्रथम पहिचानमा निकै चनाखो हुनु पर्छ । सहि किसिमले पहिचान कायम गर्न राज्यको नागरिकता जुन निकायले प्रदान गर्छ अपाङ्ग परिचय पत्र पनि सोही निकायले नै गर्नु पर्ने कानूनी व्यवस्था मिलाईनु पर्छ । अन्यथा अपाङ्गताको क्षेत्र सधै मर्कामा परिरहने छ ।

अन्नपुर्ण पोष्ट मा प्रकाशित